Sri Lakshmi Kavacham – śrī lakṣmī kavacam
lakṣmī mē cāgrataḥ pātu kamalā pātu pr̥ṣṭhataḥ |
nārāyaṇī śīrṣadēśē sarvāṅgē śrīsvarūpiṇī || 1 ||
rāmapatnī tu pratyaṅgē rāmēśvarī sadā:’vatu |
viśālākṣī yōgamāyā kaumārī cakriṇī tathā || 2 ||
jayadātrī dhanadātrī pāśākṣamālinī śubhā |
haripriyā harirāmā jayaṅkarī mahōdarī || 3 ||
kr̥ṣṇaparāyaṇā dēvī śrīkr̥ṣṇamanamōhinī |
jayaṅkarī mahāraudrī siddhidātrī śubhaṅkarī || 4 ||
sukhadā mōkṣadā dēvī citrakūṭanivāsinī |
bhayaṁ haratu bhaktānāṁ bhavabandhaṁ vimuñcatu || 5 ||
kavacaṁ tanmahāpuṇyaṁ yaḥ paṭhēdbhaktisamyutaḥ |
trisandhyamēkasandhyaṁ vā mucyatē sarvasaṅkaṭāt || 6 ||
kavacasyāsya paṭhanaṁ dhanaputravivardhanam |
bhītivināśanaṁ caiva triṣu lōkēṣu kīrtitam || 7 ||
bhūrjapatrē samālikhya rōcanākuṅkumēna tu |
dhāraṇādgaladēśē ca sarvasiddhirbhaviṣyati || 8 ||
aputrō labhatē putraṁ dhanārthī labhatē dhanam |
mōkṣārthī mōkṣamāpnōti kavacasya prasādataḥ || 9 ||
garbhiṇī labhatē putraṁ vandhyā ca garbhiṇī bhavēt |
dhārayēdyadi kaṇṭhē ca athavā vāmabāhukē || 10 ||
yaḥ paṭhēnniyatō bhaktyā sa ēva viṣṇuvadbhavēt |
mr̥tyuvyādhibhayaṁ tasya nāsti kiñcinmahītalē || 11 ||
paṭhēdvā pāṭhayēdvāpi śr̥ṇuyācchrāvayēdapi |
sarvapāpavimuktastu labhatē paramāṁ gatim || 12 ||
saṅkaṭē vipadē ghōrē tathā ca gahanē vanē |
rājadvārē ca naukāyāṁ tathā ca raṇamadhyataḥ || 13 ||
paṭhanāddhāraṇādasya jayamāpnōti niścitam |
aputrā ca tathā vandhyā tripakṣaṁ śr̥ṇuyādyadi || 14 ||
suputraṁ labhatē sā tu dīrghāyuṣkaṁ yaśasvinam |
śr̥ṇuyādyaḥ śuddhabuddhyā dvau māsau vipravaktrataḥ || 15 ||
sarvānkāmānavāpnōti sarvabandhādvimucyatē |
mr̥tavatsā jīvavatsā trimāsaṁ śravaṇaṁ yadi || 16 ||
rōgī rōgādvimucyēta paṭhanānmāsamadhyataḥ |
likhitvā bhūrjapatrē ca athavā tāḍapatrakē || 17 ||
sthāpayēnniyataṁ gēhē nāgnicaurabhayaṁ kvacit |
śr̥ṇuyāddhārayēdvāpi paṭhēdvā pāṭhayēdapi || 18 ||
yaḥ pumānsatataṁ tasminprasannāḥ sarvadēvatāḥ |
bahunā kimihōktēna sarvajīvēśvarēśvarī || 19 ||
ādyāśaktiḥ sadālakṣmīrbhaktānugrahakāriṇī |
dhārakē pāṭhakē caiva niścalā nivasēddhruvam || 20 ||
iti śrī lakṣmī kavacam |
